Батыстық тарихнамадағы Қазақстандағы ашаршылық тарихы мәселелері (1931-1933 жылдар)

Abstract

Мақалада авторлар батыс ғалымдарының жарияланған зерттеулері негізінде 1931-1933 жылдардағы Қазақстандағы аштық проблемасын зерттеу дәрежесін анықтайды. Авторлар тарихнамалық материалды хронологиялық негізде үш топқа бөледі. Бірінші топқа 1930 жылдардың бірінші жартысындағы; екінші топқа ― 1980 жылдардың басы ― 1990 жылдардың соңындағы; үшінші топқа ― 1990 жылдардың соңы ― 2000 жылдардағы еңбектер кіреді. Сондай-ақ батыстық зерттеушілердің тарихнамалық деректік базасына қысқаша талдау жасалып, олардың еңбектеріндегі қамтылған мәселелер қарастырылған. Батыс зерттеушілерінің еңбектеріндегі ұжымдастыру, отырықшылыққа көшіру, ет және астық дайындау мәселелеріне назар аударылды. Сонымен қатар зерттеулерде аштықтың себептері, ауқымы мен салдары, демографиялық шығындар сияқты аспектілер қамтылғандығы көрсетіледі. Батыс ғалымдары КСРО-дағы аштық жоспарланған ісшара емес, кеңес өкіметі басшылығының ойластырылмаған саясатының нәтижесі болды деп тұжырым жасайды. Бұл кезеңдегі мемлекеттік саясат ауыл тұрғындарын экономикалық ресурс көздері ретінде пайдалануға бағытталғандығын көрсетеді.